‘बुद्धको मूर्ति तोडफोड हुँदैमा धार्मिक सहिष्णुतामा खलल पुग्दैन’

काठमाडौं– सञ्चार तथा सूचना प्रविधिमन्त्री गोकुल बाँस्कोटाले एक ठाउँमा बुद्धको मूर्ति तोडफोड हुँदैमा धार्मिक सहिष्णुतामा खलल नपुग्ने पनि दाबी गरेका छन्।

उनले रुपन्देहीमा भएकाे भगवान गौतम बुद्धको मूर्ति तोडफोड घटनाको छानविनलाइ तीब्रता दिएकाे बताए। छानविनपछि घटना कसले किन गरायो भन्ने कुरा खुल्दै जाने उनको भनाई छ।

‘यसलाई अहिले नै धार्मिक सहिष्णुतासँग जोडेर प्रश्न उठाउन आवश्यक छैन’, बिहीबार मन्त्रालयमा आयोजित पत्रकार सम्मेलनमा बाँस्काटाले भने, ‘नेपाल बहुजातीय, बहुभाषिक तथा १० वटा भन्दा बढी धर्म सम्प्रदाय नेपालमा छन्। तिनका हजारौं, चैत्य गुठी, मठमन्दिर छन्। त्यो एउटा घटनालाई लिएर त्यो कमजोर कडीमा हाम्रो सहिष्णुता खलल हुन्छ भन्ने ठान्नु हुँदैन। त्यो सम्भव छैन।’

अपराध कसले किन गर्यो भन्ने केही समयपछि खुल्दै जाने भन्दै मन्त्री बाँस्कोटाले थपे, ‘बद्मासी कसले किन गरेको भन्नेबारे सम्बन्धित निकायले छानविन गरिरहेको छ।’

रुपन्देहीको तिलोत्तमा नगरपालिकाअन्तर्गत सिद्धार्थ राजमार्गको बीच भागमा राखिएका बुद्धको मूर्तिहरु तोडफोड गरेको घटनाप्रति यसअघि प्रमुख प्रतिपक्षी नेपाली कांग्रेसले ध्यानाकर्षण जनाउँदै धार्मिक, सांस्कृतिक सहिष्णुतामा आँच आउने र धार्मिक द्वन्द्वलाई निम्त्याउने गरी नियोजित रुपमा घटना घटाइएको टिप्पणी गरेको थियो। साथै घटनाको छानविन गरी दोषीलाई यथाशिघ्र कानुनी कारवाही पनि माग गरेको छ।

तपाईको प्रतिक्रिया

सम्बन्धित समाचार