Bal-Umang

Bal-Umang

अदालतले यस्तो निर्णय गरेपछि राजपामा हलचल, किर्ते गरेको आरोप

राजविराज – राजपा नेपालका दुई केन्द्रीय सदस्यलाई सप्तरी जिल्ला अदालतले पुर्पक्षका लागि कारागार पठाएकोपछि पार्टी भित्र हलचल मचिएकाे छ। किर्ते उपभोक्ता समिति गठन प्रकरणमा केही दिनअघि पक्राउ परेका बिपी यादव र हरि मण्डललाई कारागार पठाउने आदेश अदालतले दिएपछि पार्टी भित्र हलचल मचिएकाे हाे।

सोमबार मुद्दाको सुनुवाइ हुने क्रममा नेताहरुले निर्दोषको प्रमाण पेश गर्न नसकेपछि उनीहरुलाई अदालतले पुर्पक्षको लागि कारागार पठाएको हो। बैसाख ५ गते पक्राउ परेका छिन्नमस्ता गाउँपालिका मोहनपुर निवासी यादव पूर्वसासंद समेत हुन्। उनी रातो पासपोर्ट दुरुपयोग काण्डमा पनि मुछिएका थिए। राजगढ गाउँपालिका ३ नर्घो निवासी अर्का केन्द्रीय सदस्य मण्डल स्थानीय शान्ति समितिका पूर्व संयोजक हुन्।

यसैगरी, सोही आरोपमा पक्राउ परेका पूर्वाधार विकास डिभिजन कार्यालय सिरहाका प्रमुख तथा सिनियर डिभिजनल इन्जिनियर राजकुमार गोइतलाई ४ लाख र निर्माण सामग्री आपूर्तिकर्ता दिलीपकुमार दास र रापाका स्थानीय नेता रमानन्द ठाकुरलाई जनही दुई लाख ५० हजार धरौटीमा रिहा गरिएको छ।

यादव र मण्डलसहितको संलग्नतामा अग्निसाइर कृष्णसवरण गाउँपालिकाको लेटरप्याड, प्रमुख प्रशासकीय अधिकृत धीरेन्द्र यादव, २ नम्बर वडाध्यक्ष पशुपति चौधरी र ३ नम्बर वडाध्यक्ष अरुणकुमार चौधरीको छाप किर्ते गरिएको आरोपमा प्रहरीले सबैलाई पक्राउ गरी मुद्दा चलाएको थियो।

प्रदेश २ सरकारको भौतिक पूर्वाधार विकास मन्त्रालयबाट अग्निसाइर कृष्णासवरण गाउँपालिका–२ र ३ का सडकमा माटो तथा ग्राभेल गर्न स्वीकृत योजनाको २५ लाख रकम निकाल्न किर्ते उपझोक्ता समिति गठन गर्न छाप किर्ते गरिएको प्रहरीको भनाइ छ।

तपाईको प्रतिक्रिया

सम्बन्धित समाचार