प्रधानमन्त्री निवास बालुवाटारमा सर्वदलीय बैठक आज बस्ने

काठमाडौं, पुस १९ -प्रधानमन्त्री शेरबहादुर देउवाले आफनो निवास बालुवाटारमा सर्वदलीय बैठक आज साँझ ५ बजेका लागि बोलाएका छन ।
उनले हालैसम्पन्न प्रतिनिधिसभा सदस्य निर्वाचनमा दलीय हैसित प्राप्त गर्ने दलहरुका शीर्षनेताहरुलाई बैठकमा बोलाएका हुन । निर्वाचन पश्चात दलीय असमझदारी बढेका बेला प्रधानमन्त्री देउवाले राष्ट्रियसभाको निर्वाचन र प्रदेश प्रमुख नियुक्ति विषयमा छलफल गर्न सर्वदलीय बैठक बोलाएका हुन ।नेपाली कांग्रेस, एमाले, माओवादी केन्द्र, राजपा र संघीय समाजवादी फोरमका शीर्ष नेताहरुलाई उक्त विषयमा छलफल गर्न प्रधानमन्त्रीले बोलाएका जनाईएको छ ।‘राष्ट्रियसभाको निर्वाचन मिति, प्रदेश प्रमुख र अस्थायी राजधानी तोक्ने विषयमा छलफल गर्न सर्वदलीय बैठक आह्वान गरीएको प्रधानमन्त्रीका प्रेस संयोजक गोविन्द परियारले जानकारी दिए ।
सर्वदलीय बैठकलगत्तै मन्त्रिपरिषद् बैठक राखेर राष्ट्रियसभा निर्वाचनको मिति घोषणा गर्ने तयारीमा प्रधानमन्त्री देउवा छन । प्रदेश प्रमुख र अस्थायी राजधानी पनि घोषणा गर्ने सरकारको आन्तरिक तयारी छ । सरकारले प्रदेश १ को विराटनगर, २ को जनकपुर, ३ को ललितपुर वा भक्तपुर, ४ को पोखरा, ५ को लमही वा घोराही, ६ को सुर्खेत र ७ को धनगढी तोक्ने तयारी छ । यस विषयमा प्रधानमन्त्री देउवाले मंगलबार नै माओवादी केन्द्रका अध्यक्ष पुष्पकमल दाहालसँग छलफल गरेका छन ।दाहालले राष्ट्रियसभा निर्वाचन नभई प्रतिनिधिसभाले पूर्णता नपाउने भएकाले मिति घोषणामा विलम्ब नगर्न प्रधानमन्त्री देउवालाई आग्रह गरेका थिए ।
निर्वाचन आयोगले ३५ देखि ४० दिनको समय मागेको जानकारी गराउँदै प्रधानमन्त्री देउवाले माघको तेस्रो साता नकटाउन पनि आग्रह गरेको दाहाललाई सुनाएका थिए। त्यसअघि कांग्रेस सभापतिसमेत रहेका प्रधानमन्त्रीले पार्टी नेताहरुसँग आन्तरिक छलफल गरेका थिए । पार्टी बैठकले अन्य दलसँगको सहमतिमा तत्काल राष्ट्रियसभाको निर्वाचन मिति तोक्न सुझाएको थियो । ‘निर्वाचन आयोगले पनि राष्ट्रियसभा निर्वाचन मिति खोजेकाले दलीय सहमतिमा तत्काल मिति तोक्न सरकारलाई आग्रह गरेका छौं,’ नेता बालकृष्ण खाँणले भने, ‘राष्ट्रियसभा निर्वाचन नभएसम्म प्रतिनिधिसभाले पूर्णता नपाउने भएकाले मिति घोषणामा ढिला गर्नुहुन्न ।’ अन्य दलसँगको परामर्शमा सरकारले बिहीबारसम्ममा मिति घोषणा गर्ने उनले बताए।

तपाईको प्रतिक्रिया

सम्बन्धित समाचार