राजेन्द्र महतोका दाई, श्रीमती, छोरी, ज्वाई र भतिजसहित सिङ्गै परिवार उम्मेदबार

कामाडौं ।मधेशी जनताको मुक्तिका लागि लडेको दाबी गर्दैआएका राष्ट्रिय जनता पार्टीका अध्यक्ष मण्डलका सदस्य राजेन्द्र महतोले घरका नोकर बाहेक नागरिकता लिएका सबै सदस्यलाई पार्टीमा ब्यवस्थापन गरेका छन् । महतोले श्रीमती, दाजु, छोरीज्वाईं, भतिजाहरु सबैलाई ब्यवस्थापन गरेका छन् । केहीलाई स्थानीय तहको निर्वाचनमै ब्यवस्थापन गरिसकेका छन् ।

महतोका परिवारमा सबैले अवसर पाएपछि राजपाका मध्यमस्तरका नेताहरु ‘मधेशको मुक्तिका लागि परिवार नै मैदानमा उतार्ने नेता’ भन्दै ब्यंग्य गर्न थालेका छन् । राजपाका एक केन्द्रीय सदस्यले भने–‘मधेश आन्दोलनमा शहादत प्राप्त गर्ने ११७ जनाको प्रतिनिधित्व महतोको परिवारले गर्नेभएको छ । स्थानीय तहको निर्वाचनदेखि आगामी मंसिर १० र २१ गते हुन लागेको निर्वाचनमा महतोको परिवारले पाएको जिम्मेवारीले यही कुरालाई पुष्टी गरेको छ ।

महतोको परिवारका नागरिकता लिएका सबै मधेशको अधिकारका लागि राजपाबाट मैदानमा उत्रिएका छन्’ उनले भने–‘महतो आफैं राजपाका अध्यक्ष मण्डलमा भइहाले । उनी धनुषा क्षेत्र नम्बर ३ वा सर्लाही १ मा रोजेर संघीय संसदमा उम्मेदवार हुने योजनामा छन् । श्रीमती शैलदेवी महतोलाई संघीय संसदको समानुपातिकतर्फ राख्ने कुरामा विरोध भएपछि त्यसको साटो उनले स्याङ्जाकी नरमाया ढकाल (शारदा)लाई राखेका छन् । नरमायालाई तत्कालीन सद्भावना हाल राजपाका कसैले पनि चिन्दैन । तर महतोले शारदाबाट चुनावको नाममा कुस्त लिएर उनको नाम समानुपातिकमा राखे ।’

भतिजा उपेन्द्र महतोलाई सर्लाही क्षेत्र नम्बर १ को क बाट प्रदेशसभामा उम्मेदवार बनाएका छन् । उपेन्द्र महतो महतो हरेकपटक मन्त्री हुँदाका पीए हुन् । उनले नै नियुक्ति र सरुवा बढुवाको डिलिङ गर्थे । बाँकी रहेका ज्वाई अनिल महासेठलाई सिराहाको मिर्चैया ४ को ख बाट प्रदेशसभामा उम्मेदवार बनाउने निर्णय पार्टीबाट गराइसकेका छन् । महतोले दाजु महेन्द्र महतोलाई गएको असोज ३ मा भएको स्थानीय निर्वाचनमा सर्लाहीको चन्द्रनगर गाउँपालिकाको प्रमुख बनाइसकेका छन् ।

छोरी अन्जुकुमारी महतो बाँकी रहन पुगिन् । मधेशको अधिकारका लागि छोरीको समेत आवश्यकता देखेकाले महतोले उनलाई २ नम्बर प्रदेशको प्रदेशसभाका लागि समानुपातिकतर्फ उम्मेदवार बनाएका छन् । अन्जुकुमारीको नाम २ नम्बरमा छ । आफ्नी छोरी हो भन्ने थाहा नपाउन् भनेर महतोले समानुपातिकको सूचीमा अन्जुकुमारी मात्र लेखेका छन् । नागरिकता नम्बर र ठेगाना पर्सा लेखाएका छन् । छोरीलाई राखेकोमा हुनसक्ने संभावित विरोधलाई ध्यानमा राखी पर्सा ठेगाना राखेर थर समेत नराखी नाम पठाए पनि पछि निर्वाचन आयोगले नाम सच्याउने समयमा संशोधन गर्नेगरी चलाखी गरेको राजपाका एक नेता बताउँछन् ।

पर्सामा अन्जुुकुमारी नामको कोही राजपा नेता कार्यकर्ता छैनन्, ती राजेन्द्र महतोकी छोरी हुन्, उनले भने, आयोगबाट नाम सच्याउने दिन महतोको यो सबै चलाखी खुल्नेछ । अहिले राजपाका कार्यकर्ता पर्साकी अन्जुकुमारी भनेर अलमल भए पनि उनी महतोकी छोरी हुन् ।

२०७० को संविधानसभा निर्वाचनमा महन्थ ठाकुरले सम्धिनी इन्द्रा झाको नाम पनि सुरुमा निर्वाचन आयोगमा पठाउँदा इन्द्र झा लेखेर पठाएका थिए । तत्कालीन तराई मधेश लोकतान्त्रिक पार्टीका कार्यकर्ताहरु सम्धिनीलाई सभाषद नबनाएकोमा खुसी पनि भए । तर त्यो खुसी धेरै दिन टिकेन, निर्वाचन आयोगमा पछि नाम सच्याउने समयमा नागरिकता पेश गर्दा इन्द्रा झाकै पेश भयो । र, पछि आयोगबाट फाइनल लिष्टमा इन्द्रा झाकै नाम आयो । त्यस्तै अन्जुकुमारी महतोको हकमा पनि आयोगबाट पछि सच्याइनेछ’ राजपाका एक नेताले भने ।

महतोका परिवारका सबैले अवसर पाइसकेका छन् । उनका एक पुत्र थाइल्याण्डमा ब्यापार ब्यवसाय गर्दछन् । २०६३ देखि २०६८ सम्म आपूर्ति र स्वास्थ्य मन्त्री हुँदा आर्जित र अहिले नरमायाहरुलाई सांसद बनाउने क्रममा प्राप्त सहयोगको सदुपयोग गर्न उनले पुत्रलाई ब्यापारमा लगाएको राजपाका नेताको भनाइ छ ।

महतोको परिवार नै मधेशको लागि होम्ने निर्णय विरुद्ध राजपाका नेता कार्यकर्ताहरु विरोधमा पनि उत्रिए तर उनीहरुको विरोधले पनि केही अर्थ राखेन । महतोले त्यो विरोधलाई त्यसै निस्तेज पारिदिए ।

तपाईको प्रतिक्रिया

सम्बन्धित समाचार